بتعرفوا تحضنوا كويس ؟؟؟؟؟؟

لو سمحتلى يعنى

ممكن اسالك سؤال

بتعرف تحضن كويس ؟

بتعرفى تحضنى كويس ؟

ايه السؤال الرخم ده

وانت مالك يا اخى

طبعاً اكيد هـ تقول وهـ تقولى كده

المهم هـ تعرفوا انا بسأل ليه كده بعد ما تقرأوا موضوعى

كنت اتفرجت على فيديو كليب على موقع يوتيوب بس فيديو غريب اوى معمول على اغنيه

لفريق الروك الاسترالى sick pup pies على ما اعتقد

المهم الفيديو ابتدى بـ واحد واقف و ماسك يافطه كبيره مكتوب عليها

free hugs

احضان مجانيه

فى الاول الناس بتبدى تبصله باستغراب وبعدين تمشى

واحده واحده الناس بتبدي تتجاوب معاه و بتروح تحضنه

لحد ما يبقى فى ناس كتيير بتروح و تحضنه

وبعد كده يبتدى ينتشر و يتوغل

ازاى ؟

ابتدى يدى يفط للناس مكتوب عليها نفس الكلمه و يبدأ يلم توقيعات من الناس

لتأييد الحمله بتاعته لحد ما التوقيعات اللى معاه توصل لـ 3 الاف واحد

الجميل بأه ايه

واللى انت مش هتصدقه

وهو

ان

الفيديو ده حقيقى مش تصوير كليب

دي حاجه حصلت بجد

يعنى فى واحد عمل الكلام ده فعلاً

ايوه ايوه

مجنوووون ما انا عارف

كل الكلام اللى قلته فوق ده حصل فعلاً

طبعاً الفكره مجنونه جداً و ممكن الناس تقول انها فكره فاجره

عشان مش ممكن واحد يمشى فى مصر و يحضن الناس كده

بس انا هقولك حاجه بأه ... ما تيجى ننفذ الفكره دى فى مصر

ايوه عندنا

ايه المانع ؟

بس طبعاً عشان ما يتقبضش علينا و ناخد لنا 6 شهور ونروح كلبووش

وما ادراك ما الكلبوش ؟؟؟!!!

دا بالنسبه للولاد

اما للبنات فـ ده ممنوع منعاً باتاً فـ الشارع

لانها ممكن تلاقى نفسها وبقدرة قادر فى خلال 3 دقايق فى .....

بش انا مش قصدى ننفذ الفكره بنفس الطريقه

لحسن حد يفكر انى بـ اروج للفسق والفجور

لأ طبعاً ...

ما تيجى نعمل كده مع أصحابنا ومع أهلنا

على الطريقه المصريه

هـ نسرق الفكره

( اشمعنا دى مش هـ نسرقها ما احنا بنسرق كتييير هى جت على دي ..

افلام وافيشاتها و اغانى و مسلسلات .. بجملة بأه )

المهم نرجع لمرجوعنا

بعد اذنَك وبعد اذنِك

امتى كانت اخر مره حضنت فيها الست الوالده

ومتقوليش انا كبرت على الكلام ده

وامتى كانت اخر مره اترميت فى حضن ابوك

امتى ؟!

المشكله يا جماعه ان احنا مش بنحضن ابونا وامنا واخواتنا عشان عندنا مشاكل معاهم

أو مش بنعرف نحضن

( لا قدر الله )

لأ ... احنا عندنا مشاكل عشان مش بنحضنهم أصلاً

فى أخ كبير بيفكر ياخد اخته الصغيره فى حضنه وينصحها

فى اب بياخد ابن فى حضنه

فى شاب عنده حاجه وعشرين سنه بترمى فى حضن امه او اخته ويعيط

فى سؤال تانى أكتر مأساويه من اللى فاتوا

انت بتحضن مراتك ؟ ... انتى بتحضنى جوزك ؟

يا جماعه بالحضن ده بتخففوا عن بعض الهم والكرب والـ ( سورى ) الارف اللى احنا فيه

من ساعة ما بنصحى لحد ما نيجى ننام

طب فى حد فات على زواجه سنه ولا اتنين ولسه بيحضن مراته

طبعاً اعتقد ما بيحصلش الا فى أضيق الحدود

طب تعرفوا ان الطفل اللى بيتحضن من أهله كتيير وهو لسه صغير بيطلع شخصيه سويه وحنينه على الناس اللى حواليه

بس الظاهر ان ثقافة الحضن دى بقت معدومه عند الشعب المصرى و ساعات الناس تبصلها على انها شيْ مخجل

ازاى واحد فى سنى يجرى على ابوه او امه و يحضنهم كده ؟؟!!

ولا ازاى احضن واحد صاحبى ... الناس تفهمنا غلط

الى اخر هذا الكلام اللى لا يودى ولا يجيب

لدرجه ان بقى عندنا حاله من الجفاء واللامبالاه ناحية بعضنا

محدش تقريباً بيفكر يحس بالتانى

وغالباً الحضن المصرى بيبقى ليه هدف واحد بس كلنا عارفينه

لأ ويا ريت بنحضن كويس

واخيراً وليس آخراً ما اعتقدش ان الحاله بقت سيئه أوى

ممكن نلحق نحضن بعضنا

ومتخفش مع الوقت هـ تعرف تحضن كويس أوى

اها والله الواحد مش ضامن نفسة مشكور اوى اوى يا مان